بونی (پریس ریلیز)صوبائی حکومت کے احکامات اور رہنمائی کے مطابق ضلعی انتظامیہ اپر چترال کی مکمل نگرانی میں افغان باشندوں کی واپسی کا باقاعدہ آغاز ہوگیا۔ ڈپٹی کمشنر اپر چترال محمد عمران خان کی سرپرستی اور ایڈیشنل ڈپٹی کمشنر فنانس اینڈ پلاننگ محمد انور کی نگرانی میں آج ہیڈکوارٹر بونی سے تقریباً 50 افغان مہاجرین پر مشتمل پہلی کھیپ کو باعزت طریقے سے افغانستان روانہ کیا گیا۔روانگی کے موقع پر چیئرمین تحصیل کونسل مستوج سردار حکیم، پلاننگ آفیسر شمشیر علی خان، صدر پریس کلب اپر چترال، تجار یونین بونی کے صدر و جنرل سیکریٹری، مقامی میڈیا کے نمائندگان اور عوام کی بڑی تعداد موجود تھی۔ایڈیشنل ڈپٹی کمشنر محمد انور نے اس موقع پر کہا کہ صوبائی حکومت کی پالیسی کے مطابق افغان مہاجرین کو باعزت اور محفوظ طریقے سے وطن واپس بھیجا جارہا ہے۔ انہوں نے بتایا کہ واپسی کے اس عمل میں مہاجرین کے سفری اخراجات مکمل طور پر سرکاری خرچے پر ادا کیے جارہے ہیں تاکہ ان کی وطن واپسی سہولت اور احترام کے ساتھ ممکن ہو۔افغان مہاجرین نے ضلعی انتظامیہ اپر چترال کا شکریہ ادا کرتے ہوئے کہا کہ انہیں بونی اور دیگر مقامات پر قیام کے دوران عزت، احترام اور بہترین تعاون فراہم کیا گیا۔ انہوں نے اپر چترال کے عوام کے حسنِ سلوک اور مہمان نوازی کو بھی سراہا۔ضلعی انتظامیہ اپر چترال نے واضح کیا کہ افغان شہریوں کی واپسی کا یہ عمل شفاف، باقاعدہ اور انسانی ہمدردی کے اصولوں کے مطابق جاری رہے گا
