چترال(ایف بی رپورٹ) سوئی نادرن گیس پائپ لائنز لمیٹڈ کے افسران نے دروش، بروز/آیون اور چترال میں گیس پلانٹس کے مجوزہ مقامات کا دورہ کیا ہے۔لاہور ہیڈ آفس سے آنے والے وفد میں ریاست علی تارڑ، ہیڈ آف سول ڈیپارٹمنٹ اور محمد مظہر محمود، ٹیکنیکل آفیسر شامل تھے، جنہوں نے تمام تین مقامات پر تکنیکی جائزہ لیا۔ وزیرِاعظم کی ہدایات کی روشنی میں آئندہ پیر کے روز ایس این جی پی ایل کا ایک اور تکنیکی وفد چترال کا دورہ کرے گا جو گیس پائپ لائنز کے مزید پہلوؤں کا جائزہ لے گا۔
یاد رہے وزیرِاعظم شہباز شریف نے دانش اسکول کے افتتاح کے موقع پر تمام سیاسی جماعتوں بالخصوص جماعتِ اسلامی، جمیعت علمائے اسلام، اے این پی اور مسلم لیگ (ن)— کے رہنماؤں کی مشترکہ درخواست پر چترال کے تین اہم مقامات دروش آیون اور چترال شہرمیں گیس پلانٹس کی تنصیب و منتقلی کا باضابطہ اعلان کیا تھا۔
